રક્ષાબંધન

સૂતરને તાંતણે વિશ્વને વીંટી શકાય છે વીરા,
લાગણીમાં ઝબોળેલ હોય એની લીર જો

મૂઠ્ઠી જારથી દળદર ફીટી શકે છે જીવનભરનું
સ્નેહમાં હોય જનનીની કૂખનું ખમીર જો

પિયરના અમિયલ આંબાને ન લાગે સૂકારો
વિસામો લેતાં પાયા મારા આંસુના નીર જો

ફૂલડાં વીણતાં મેં ખોયા સપના તારા બાગમાં
કદીક જડે તો વીરા, સૂતા મૂકજે તારે શિર જો

વીંટળાયો સ્નેહ શુધ્ધ રક્ષા કરતો બહેનીની
ભાઈ કૃષ્ણે સભામાં પૂર્યા દ્રોપદીના ચીર જો

(શબ્દાર્થ: જાર = જુવાર)